WAWEKA KAMBI KUPINGA MASHINDANO YA KOMBE LA DUNIA

 

Maelfu ya waandamanaji nchini Brazil wameweka kambi nje ya uwanja katika mji wa Sao Paulo kunakotarajiwa kuchezwa mechi ya ufunguzi ya Mashindano ya Kombe la Dunia mwaka huu.

Waandamanaji hao wanasema kuwa wamechoshwa na ongezeko la kodi ya nyumba na makazi na wanataka kuonesha hasira zao kwa kitendo cha nchi hiyo kuwa mwenyeji wa mashindano hayo ilhali suala la umasikini likiendelea kuwatafuna raia.

Katika mitaa ya Itakera mjini Sao Paulo, watu wapatao 2,000 wametwaa eneo karibu na uwanja wa michezo wa Arena Corinthians, ambao utakuwa mwenyeji wa mechi ya ufunguzi wa mashindano hayo yaliyopangwa kuanza mwezi Juni.

Watu wameonekana wakiendelea kumiminika katika eneo hilo wakiwa na vifaa vya ujenzi katika hali inayoonekana kuwa wanataka kujenga kambi ya kudumu na wataendelea kukaa mahali hapo.

Kiongozi wa vuguvugu la watu wasiokuwa na makazi nchini humo, Laura Cristina da Silva, amesema kuwa wanalazimika kuchagua kati ya kuwalisha watoto wao na kulipa kodi ya nyumba. Pesa ambayo imetumika kujenga viwanja vya michezo ingetumika kuwapatia mahala pa kuishi.

Mji wa Sao Paulo ni miongoni mwa miji yenye gharama za juu kabisa za kodi za pango na makazi duniani.

Wakati hayo yakiendelea, viongozi wa mji huo wanasema kuwa wameorodhesha maeneo 90 mbalimbali ambayo yanashikiliwa kwa nguvu na watu wanaodai kuwa hawana mahali pa kuishi.

Kwa miezi kadhaa sasa, hisia za kupinga michuano ya kombe la dunia nchini humo zimekuwa zikiongezeka. Watu hao wanaikosoa serikali ya Brazil kuwa pesa iliyotumika kwenye michuano hiyo ingewekezwa katika huduma bora za afya, elimu, usafiri, makazi na maisha ya watu wenye hali duni za kimaisha.


Brazil ni nchi kubwa yenye uchumi mkubwa zaidi katika eneo la Amerika ya Kusini; lakini kwa mujibu wa Benki ya Dunia, asilimia 15.9 ya wananchi milioni 200 wanaishi katika umaskini wa kutupwa.
Share on Google Plus

About Kabuga Kanyegeri

This is a short description in the author block about the author. You edit it by entering text in the "Biographical Info" field in the user admin panel.