KOFFI OLOMIDE JELA MIEZI 18

Police arrest Congolese musician, Koffi Olomide

Nyota wa muziki kutoka Jamhuri ya Kidemokrasia ya Kongo, Koffi Olomide, amehukumiwa kifungo cha miezi 18 jela na mahakama moja mjini Kinshasa bila  kutakiwa kulipa faini yoyote kwa kosa la kumshambulia mmoja wa watumbuizaji wake wa kike mjini Nairopbi.

Hukumu hiyo imeongeza pigo anguko la kazi yake ambalo lilianza kwa kumpiga teke mmoja wa wachezaji wake kwenye Uwanja wa ndege wa Kimataifa wa Jomo Kenyatta (JKIA), mjini Nairobi Ijumaa iliyopita. Olomide aliondolewa nchini humo sambamba na wachezaji wake watatu wa kike.

Mwanamuziki huyo alikamatwa na kuhojiwa mjini Kinshasa, jambo lililoongeza masaibu kwenye umaarufu wake baada ya kufukuzwa nchini Kenya.

Shirika la habari la Uingereza, BBC, liliripoti kuwa Olomide alikamatwa kwa amri ya Mwanasheria Mkuu.

Masaibu ya Olomide yamevuka mipaka baada ya Chama cha Wakulima na Wafanyabiashara wa Zambia kusalimu amri mbele ya shinikizo la umma na kufutilia mbali maonesho yake ya muziki yaliyokuwa yamepangwa kufanyika mjini Lusaka.

Chama hicho kilisema kuwa tukio hilo la “kusikitisha” ndio sababu ya kufutilia mbali ziara ya mwanamuziki huyo mwenye umri wa miaka 60 anayepigania kufikia rekodi ya mkongwe wa muziki wa Kongo Franco (Luambo Luanzo Makiadi), aliyefariki mwaka 1989, lakini amekuwa mtu mwenye ghasia na matukio ya utovu wa maadili.

Mapema siku ya Jumapili, chama cha wanamuziki wa Zambia kilitoa taarifa na kutangaza kuwa wakati wa ziara ya Olomide nchini humo katika kilele cha Mwaka Mpya wa 2013, alimpiga mtumbuizaji wake na mpiga picha mmoja kwenye tamasha la muziki. Lakini alifanikiwa kuwatoroka polisi ambao walishindwa kumkamata.

Kwa mujibu wa gazeti la Post la nchini Zambia, mwaka 2011, Olomide aliwatoroka polisi wa Zambia kwa kutumia pikipiki akiwa na promota wake.

 “Koffi ameonesha kuwa ni mtu wa vurugu wakati wanamuziki wanatazamwa kama mabalozi wa amani,” chama hicho kilisema.

Baada ya kufukuzwa nchini Kenya, Olomide, ambaye anachukuliwa kama mwanamuziki mwenye nguvu zaidi katika wanamuzi wa sasa nchini Kongo, alirudi nchini mwake na kukaribishwa kwa shamrashamra kwenye uwanja wa ndege.

Nchini Togo, wanasheria wametoa wito wa kukamatwa na kushitakiwa kwa Olomide baada ya kushindwa kutokea kwenye tamasha la muziki mjini Lome ambapo alikuwa ameshalipwa sehemu ya pesa yake.

Nchini mwake taarifa za vyombo vya habari zinaonesha kuwa amekuwa akihusishwa na matukio mbalimbali lakini uhusiano wake na serikali ya Rais  Kabila umekuwa ukimlinda dhidi ya kufikishwa kotini.

Mnamo Oktoba 2014, alikamatwa na polisi nchini Kongo kwa sababu ya kujipachika jina la Vieux Ebola (Ebola mzee), ambalo alilitumia katika mabango yake kwa lengo la kutangaza tamasha lake la muziki.


Olomide alikamatwa katika kipindi ambacho ugonjwa wa Ebola ulikuwa umeua watu 50 nchini humo na ambapo serikali ilikuwa ikipambana dhidi ya madai ya kushindwa kushughulikia tatizo la ugonjwa huo. Serikali ilimwambia kuwa jina hilo halikubaliki.

Mbali na jina hilo la Vieux Ebola, alikuwa na majina mengine ya kujipachika yapatayo 35, rekodi ya majina ambayo hakuna mwanamuziki yeyote duniani aliyeifikia.

Muda mfupi baada ya kukamatwa, alijipachika jina lingine la “Benedict XVI wa  Congo”  — jambo lililowakasirisha waumini wengi wa Kikatoliki kwa sababu jina hilo lilionekana kama ni tusi kwa Papa Benedict XVI, kiongozi wa zamani wa Kanisa Katoliki duniani.

Mnamo Agosti 2012, alisimamishwa kwa muda wa miezi mitatu baada ya kukutwa na hatia ya kumshambulia prodyuza wake ambaye alikuwa akimdai.

Mnamo Februari 15, 2012, hakimu mmoja wa Ufaransa alimtia hatiani Olomide kwa makosa matatu ya ubakaji na vizuizi haramu, baada ya malalamiko kutoka kwa waimbaji wake watatu.

Mwaka 2008, alikamatwa baada ya kumpiga mpiga picha kwenye tamasha moja la muziki mjini Kinshasa. Baadaye ulifanyika usuluhishi.


Olomide ambaye majina yake mengine ni Antoine Christophe Agbepa Mumba ni mwanamuziki maarufu, mtumbuizaji na prodyuza mwenye nyimbo zinazovuma sana huku albamu zake zikiwa zimewekwa kwenye orodha ya kimataifa ya albamu 1001 ambazo mtu anatakiwa kuzisikiliza kabla ya kufa.

CHANZO: The citizen

Kwa habari kupitia WhatsApp, jiunge: +255 712 566 595
Share on Google Plus

About Kabuga Kanyegeri

This is a short description in the author block about the author. You edit it by entering text in the "Biographical Info" field in the user admin panel.