MAHUSIANO: SIRI 10 AMBAZO MWANAUME ANATAKIWA KUZIJUA KUHUSU MWANAMKE




Kwa kiasi fulani mwanamke ni kiumbe mgumu kumuelewa, na linalomfanya awe hivyo ni kwamba wanawake wote wanatofautiana. Ili mwanaume apate kumuelewa, wakati fulani huenda kuchukua ushauri kwa marafiki, lakini wakati fulani mawazo yao huwa sahihi au huwa sio sahihi.
                       
1.    Mwanamke anapenda ahisi kuwa yeye ni wa kipekee. Anapenda ahisi kuwa mumewe anamuwaza na anapenda kumjali. Na hilo sio gumu hata kidogo. Ujumbe mfupi wa simu utakaomtumia ukiwa kazini, kujali hisia zake anapokuwa na huzuni na busu laini unapotoka kazini  vinatosha kumuonesha yote hayo.                       

2.    Mke anapenda mume amsikilize na aheshimu mawazo yake. Mume anapomsikiliza mkewe huimarisha sana mafungamano yao. Mke hataki ukubali kila anachosema, bali anataka usikilize kila analosema, iwe ni wazo, kisa au malalamiko.

3.    Siku zote mwanamke anapenda kusikia ukweli kutoka kwa mumewe. Anapohisi kuwa mumewe hamwambii ukweli huanza kuwa na shaka nyingi na inakuwa ngumu kumshawishi tena. Unatakiwa kuwa muwazi kama unampenda mkeo na unataka utulivu na upendo.

4.    Kusaidia kazi za nyumbani au kuangalia watoto. Siku zote mwanamke anahitaji usaidizi. Tafiti mbalimbali zimesisitiza kuwa wanaume wanaowasaidia wake zao nyumbani na kutunza watoto hupata mahabba motomoto kama zawadi kutoka kwa wake zao, kwa sababu usaidizi huo humpa nguvu mwanamke na kumfanya amheshimu mumewe na kumthamini.

5.    Mwanamke ni kiumbe mwenye hisia kali sana kwenye ukosoaji. Kumuelewa mwanamke inahitaji kutengeneza njia za kuzungumzia malalamiko zisizoathiri hisia zake hata kidogo.

6.    Akili ya mwanamke inahitaji muda mrefu zaidi ili kufuta athari za ugomvi uliopita. Mwanamke hasahau dhulma aliyofanyiwa au ugomvi kwa urahisi. Anahitaji muda mrefu zaidi ya ule anaouhitaji mwanaume.

7.    Mwanamke anampenda mwanaume anayeweka wazi mambo ya maisha yake. Mwanamke anapenda ajue kila kitu kuhusu mumewe, sio kwa lengo la kumdhibiti au kumkosoa, bali anataka ahisi kuwa mafungamano yake kwa mumewe ni makubwa.

8.    Mwanamke hapendi mwanaume awe mtu wa kumpa amri. Utafiti unasema kuwa mwanamke anapenda awe na uhuru wa mawazo na uchaguzi, anapenda ahisi kuwa mumewe anamuunga mkono bila kumpa amri.

9.    Linapotokea tatizo au kutoelewana, mwanamke anapenda lizungumzwe, hilo humfanya ahisi kuwa yu karibu zaidi na mumewe. Hata hivyo, jambo hilo linapingana na tabia ya wanaume ambao wanapendelea kumaliza jambo haraka au kwa kulifukia.

10. Mwanamke anapenda mumewe amtazame pindi anapozungumza. Mwanamke anadhani kuwa mume anapokuwa hamtazami anakuwa hamsikii. Hili linaweza kuwa jambo la ajabu kwako, lakini ndio ukweli.


Kwa hisani ya: www.ndoamaridhawa.com



Share on Google Plus

About Kabuga Kanyegeri

This is a short description in the author block about the author. You edit it by entering text in the "Biographical Info" field in the user admin panel.