HOTUBA YA JAMMEH AKITANGAZA KUACHIA MADARAKA




Aliyekuwa Rais wa Gambia, amewahutubia Wanagambia akieleza kwa nini ameamua kuachia madaraka na kuitakia nchi hiyo fanaka na baraka tele.

Yahya Jammeh, ambaye aliitawala nchi hiyo kwa muda wa miaka 22, ametoa maelezo hayo jana Jumamosi asubuhi - kwa majira ya nchi hiyo – katika hotuba iliyotangazwa kwenye Redia na Televisheni ya Serikali ya Gambia (GRTS).

Katika hotuba hiyo, Bwana Jammeh alisema kuwa alifanya juhudi kubwa kwa ajili ya nchi yake, na kuamua kuachia madaraka kwa maslahi ya amani na usalama wa Gambia.

Alisema kuwa anaamini katika umuhimu wa mazungumzo na alifurahi kuona kwamba mzozo wa kisiasa ulioikumba nchi hiyo tangu Desemba 2016 haukusababisha kifo chochote.

Hata hivyo, kiongozi huyo hakuelezea kipi anachopanga kufanya baadaye na iwapo ataendelea kushiriki katika siasa za taifa hilo la Afrika Magharibi.

Hapa chini tumekuwekea hotuba kamili ya Bwana Jammeh kama ilivyotafsiriwa na Mzizima 24.


======================

Wanagambia wenzangu,

Kazi ya kwanza kama rais, amiri jeshi mkuu wa majeshi ya ulinzi na kama mzalendo ni kuyalinda maisha ya Wanagambia katika mazingira na matukio yoyote. Na hili ni jukumu takatifu sana kwangu.

Daima nimefanya juhudi za kustawisha amani na usalama wa taifa letu na bara la Afrika. Katika kipindi chote hiki ambacho Allah Subhanahu  Wa Taala kwa hekma Yake alinipa fursa na idhini ya kuwa na madaraka, na kwa kipindi chote ambacho wananchi wa Gambia wamekuwa na imani nami, kazi yangu ya mwanzo imekuwa ni kutetea heshima ya watu wetu na uhuru kamili wa taifa hili adhimu.

Kutokana na juhudi mbalimbali tulizofanya sisi na wale waliotutangulia kama taifa, Gambia imepata matlaba yake ya kustawisha mustakbali wake na majaliwa yake. Hii ni njia ambayo muda wote nimekuwa tayari kuitetea, hata kwa kuyatoa maisha yangu. Hatua zote tulizozichukua katika kujenga taifa hili mpaka hapa lilipo zimetutofautisha miongoni mwa jamii ya mataifa na kutupatia fahari ya daraja adhimu katika historia.

Pamoja na yote hayo, mimi kama Muislamu na mzalendo, ninaamini kwamba hakuna ulazima wa tone hata moja la damu kumwagika. Tangu kuanza kwa msuguano huu wa kisiasa ambao taifa letu adhimu linaupitia, niliahidi mbele ya Allah Subhanahu  Wa Taala na taifa zima kuwa masuala yote yanayotukabili kwa sasa yangetatuliwa kwa amani.

Hakika ninamshukuru Allah Subhanahu  Wa Taala kwamba mpaka sasa, hakuna tukio lolote la kupoteza maisha lililotokea. Ninaamini katika umuhimu wa majadiliano na (ninauamini) uwezo wa Waafrika wa kushughulikia sisi wenyewe changamoto zote zinazoikabili demokrasia, maendeleo ya kiuchumi na kijamii.

Ni kwa sababu hiyo kwamba nimeamua, kwa dhamiri njema, kulivua joho la uongozi wa taifa hili adhimu nikitoa shukrani zangu zisizokuwa na kikomo kwa Wanagambia wote  – wanawake, watoto, vijana na wanaume – na marafiki wa Gambia ambao wamenisaidia kuijenga Gambia ya kisasa kwa miaka 22. Zaidi ya yote, uhuru wa watu huru wa Gambia, na daima kwa kushirikiana nanyi nitautetea uhuru huu ambao tuliupigania kwa nguvu zote.

Uamuzi wetu wa leo haukusukumwa na kitu kingine bali (umetokana na) kujali maslahi yenu makuu, watu wa Gambia na taifa letu pendwa. Dua na raghba zangu ni kuona kuwa amani na usalama vinaendelea kutawala Gambia. Katika zama hizi ambazo tunashuhudia mizozo na vita katika maeneo mengine ya Afrika na dunia, amani na usalama wa Gambia ni urithi wetu sote ambao tunapaswa kuulinda na kuutetea kwa nguvu zote.

Ninaona fahari na heshima kwamba nimeitumikia nchi yetu, Gambia. Wakati nikiwashukuru nyote, wanaume, wanawake na watoto, wanausalama wote, raia watiifu na wale wote walioniunga mkono au waliokuwa dhidi yangu katika kipindi chote hiki, ninawasihi wote kuweka mbele maslahi adhimu ya taifa letu, Gambia, dhidi ya maslahi yote ya ukabila, na kufanya juhudi za pamoja kama taifa moja kuendelea kulinda mafanikio adhimu ya nchi hii, uhuru wake, amani, uthabiti, mshikamano na mafanikio ya kiuchumi yaliyopatikana katika kipindi chote cha miaka hii.

Dua zangu ni kuiombea Gambia iendelee kuwa moja na yenye maendeleo kwa usatwi wa kila mmoja wetu na iwe fakhari kwa watu wote.

Ninajisalimisha mbele ya hukumu ya Allah Subhanahu  Wa Taaala ambaye hukumu Yake haifungwi na ukomo wa mwanadamu, zama na historia. Allah Subhanahu  Wa Taala Ndiye pekee Mwenye dhamana kuu ya amani na haki.

Mwisho, kwa dhati na kwa moyo mmoja, ninaona fahari kwamba nimewatumikia nyinyi na taifa letu tukufu. Ninamshukuru kila mtu kutoka vikosi vya usalama, viongozi wa serikali, wa sasa na wa zamani, makada wa chama changu, na zaidi kabisa ninawashukuru nyinyi watu wa Gambia, Wabunge, wa sasa na wa zamani, kwa imani na uungaji mkono wa dhati mlionipatia.


Ninamuomba Allah Subhanahu  Wa Taala aendelee kuiongoza njia yetu na alitie nuru na baraka taifa na nchi yetu hii nzuri.

Ninachukua fursa hii kumshukuru mama yangu, mke wangu na wanangu kwa dua na uungaji mkono walionipatia kwa kipindi chote cha miaka 22.

Ninawashukuru nyote, na ninamuomba Allah Subhanahu  Wa Taala aendelee kuibariki nchi yetu.


Share on Google Plus

About Kabuga Kanyegeri

This is a short description in the author block about the author. You edit it by entering text in the "Biographical Info" field in the user admin panel.