CHADEMA WAJITOSA KUMNG’OA PROF. LIPUMBA BUGURUNI

Saed Kubenea, Makamu Mwenyekiti Kanda ya Pwani (Chadema) akizungumza na Waandishi wa habari


CHADEMA wameanzisha operesheni maalum ya kumwondoa Profesa Ibrahimu Lipumba, aliyekuwa Mwenyekiti wa Chama cha Wananchi (CUF) katika chama hicho imezinduliwa leo, anaandika Irene David.

Oparesheni hiyo iliyopewa jina la “Operasheni Ondoa Msaliti CUF (OBM) imezinduliwa na Chama cha Demokrasia na Maendeleo (Chadema) kwa kushirikiana na viongozi wa CUF wanaomuunga mkono Maalim Seif Sharif Hamad, Katibu mkuu wa CUF.

Maamuzi hayo yalifikiwa jana baada ya kikao cha pamoja kilichofanywa na viongozi wa Chadema Kanda ya Pwani na viongozi wa CUF kujadili mgogoro ndani ya CUF na mstakakbali wa chama hicho na vyama vinavyounda Umoja wa Kutetea Katiba ya Wananchi (Ukawa).

Saed Kubenea, Makamu Mwenyekiti Kanda ya Pwani ambaye pia ni Mbunge wa Ubungo (Chadema) amesema: “Sisi kama Chadema kwa umakini kabisa tutawasaidia viongozi wa CUF na wanachama wao kumwondoa msaliti Prof. Lipumba Buguruni.”

“Katika hili pia tumeamua kila siku ambayo kesi ya CUF inaendeshwa mahakamani wanachadema tutajitokeza kuisindikiza CUF tunayoitambua; tumekubaliana Mameya wetu wote wa jiji la Dar es Salaam wasitoe ushirikiano kwa mtu yeyote wa vimelea vya Lipumba.”

Kwa upande wake Dkt. Makongoro Mahanga, Mwenyekiti wa Chadema mkoa wa Dar es Salaam amesema: “Chadema ni washirika wa CUF katika Ukawa. Hivyo tunaamini wanavyoyumbishwa CUF hata sisi hatuwezi kubaki sarama.”

“Tumeona tunaathirika. Makao makuu ya Chadema na CUF yapo katika kanda yetu. Tumejiridhisha kwamba mgogoro si kati ya Lipumba na Seif, ni kati ya dola. Tumeamua kupambana na dola kwa kuanza na hawa wasaliti wakiongozwa na Lipumba.”

Aidha, Riziki Ngwali, Mbunge wa Viti Maalum na Kiongozi wa Wabunge wa CUF bungeni, amesema “Tunataka pia Watanzania watambue kuwa mgogoro wa dola dhidi ya CUF ni wa kupandikizwa. Kwa sababu vyombo vyake vinatumika.”


CHANZO: Mwanahalisi Online
Share on Google Plus

About Kabuga Kanyegeri

This is a short description in the author block about the author. You edit it by entering text in the "Biographical Info" field in the user admin panel.